- 771 -

1453. Mai 16. Wien.

König Ladislaus entbietet den Geistlichen und Mannen des Landes Liegnitz, dass in demselben kein anderes als liegnitzer Bier geschenkt werden soll.

Wir Losslaw von gots gnaden zu Hungern, zu Behemen, Dalmacien, Croacien &. kunig, herczog zu Oesterreich vnd marggraf zu Merhern etc. enbieten den ersamen vnd erbern vnsern andechtigen vnd getrewn lieben, den prelaten, priesterschafft vnd mannen vnsers lannds, Legnicz vnd die guter darinn habent, vnser gnad vnd alles gut, wir lassen ew wissen, daz wir den erbern weisen, vnsern getrewn lieben. . den ratmannen vnd burgern vnserer stat Legnicz, die gnad getan haben, daz nu hinfur in demselben vnserm lannd in allen kretschem vnd tafern kain andir pir geschennckht noch vertan sol werden dann Legniczer pir, das daselbs zu Legnicz gepraut wirdet, nach lawt vnsers briefs, so sy darumb habent, emphelben wir ew ernstlich, daz ir mit allen ewern lewten vnd pawrn schaffet vnd darob seit, das sy dem also gehorsam sein, bey vermeidung der peen in demselben vnserm brief begriffen; wir haben auch den egenanten vnsern burgern gwalt geben, das allenthalben offenlich lassen beruffen, daran ir sy nicht irren sollet Das ist vnser ernstliche maynung. Geben zu Wienn an mitichen vor dem heiligen Phingstag. Anno domini etc. LIII°, vnserer kronung vnsers reichs des Hungrischen etc. im drewczehenden iare.

O. d. St L. No. 417. Das Siegel abgesprungen, mit 2 Duplicaten, No. 417a. b.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866